पोलीस पाटील भरती 2026 चा निकाल जाहीर 

* तात्पुरती निवड यादी 2 मार्च रोजी प्रसिद्ध होणार

हिंगोली (जिमाका), दि. 27 : हिंगोली जिल्ह्यातील सर्व उपविभागांतील पोलीस पाटील भरती 2026 प्रक्रियेअंतर्गत घेण्यात आलेल्या परीक्षेचा निकाल जाहीर करण्यात आला आहे. या भरतीची लेखी परीक्षा दि. 08 फेब्रुवारी 2026 रोजी घेण्यात आली होती. लेखी परीक्षेत पात्र ठरलेल्या उमेदवारांच्या मुलाखती दि. 12 फेब्रुवारी ते 23 फेब्रुवारी 2026 या कालावधीत पार पडल्या.

मुलाखतीनंतर तात्पुरत्या निवड करण्यात आलेल्या उमेदवारांची यादी दि. 02 मार्च 2026 रोजी प्रकाशित करण्यात येणार असल्याची माहिती प्रशासनाने दिली आहे.

दरम्यान, ही भरती प्रक्रिया पूर्णपणे पारदर्शक व गुणवत्तेच्या आधारे राबविण्यात येत असल्याचे स्पष्ट करण्यात आले आहे. कोणतीही व्यक्ती पोलीस पाटील निवडीच्या नावाखाली पैशांची मागणी करत असल्यास किंवा खोटी आश्वासने देत असल्यास ते दंडनीय गुन्हा असून, अशा प्रकारची माहिती मिळाल्यास तात्काळ 8584088584 किंवा 02456-221701 या दूरध्वनी क्रमांकावर संपर्क साधावा, असे आवाहन करण्यात आले आहे. संबंधित व्यक्तींवर तसेच अशा कृत्यात सहभागी उमेदवारांवर कायदेशीर कारवाई करण्यात येणार असून तक्रारदाराची ओळख गोपनीय ठेवण्यात येईल.

हिंगोली जिल्हा प्रशासनाच्या वतीने सर्व उमेदवारांनी सतर्क राहावे व अफवांवर विश्वास ठेवू नये, असे आवाहन उपविभागीय अधिकारी योगेश मीना यांनी प्रसिद्धीपत्रकाद्वारे केले आहे.

******