जिल्हास्तरीय अन्न सुरक्षा व सकस आहार सुकाणू समितीची आढावा बैठक संपन्न

हिंगोली (जिमाका), दि. 26 : जिल्हाधिकारी तथा समितीचे अध्यक्ष राहुल गुप्ता यांच्या अध्यक्षतेखाली जिल्हास्तरीय अन्न सुरक्षा व सकस आहार सुकाणू समितीची आढावा बैठक संपन्न झाली.

या बैठकीस जिल्हा आरोग्य अधिकारी, जिल्हा अधीक्षक कृषी अधिकारी, प्रतिनिधी शिक्षणाधिकारी (प्राथमिक), जिल्हा परिषद तसेच जिल्हा पुरवठा कार्यालयाचे प्रतिनिधी तसेच सदस्य सचिव तथा सहाय्यक आयुक्त (अन्न) उपस्थित होते. 

या बैठकीमध्ये जिल्ह्यातील अन्न सुरक्षेबाबत सविस्तर आढावा घेण्यात आला. अन्न आस्थापनांची तपासणी, अन्न नमुना संकलनाची कार्यवाही तसेच परवाना व नोंदणी प्रक्रियेबाबत सविस्तर चर्चा करण्यात आली. गर्दीच्या हॉटेल्स व मिठाई दुकानांमध्ये अन्न सुरक्षा कायद्याची प्रभावी अंमलबजावणी करण्याचे निर्देश जिल्हाधिकारी राहुल गुप्ता यांनी यावेळी दिले. 

यावेळी जिल्हाधिकारी श्री. गुप्ता यांनी अन्न सुरक्षा अधिकाऱ्यांनी तपासणी व नमुना संकलनाचे काम अधिक गतीने व प्रभावीपणे करण्याबाबत मार्गदर्शन केले. तसेच अन्न व्यवसायिकांनी परवाना व नोंदणी घेण्याचे प्रमाण वाढविण्यासाठी व्यापक जनजागृती करावी व आवश्यक कार्यवाही करावी, अशा सूचना दिल्या. 

*******