अवैध गौणखनिज उत्खनन प्रकरणातील जप्त जंगम मालमत्तेचा 10 फेब्रुवारी रोजी द्वितीय जाहीर लिलाव

 

 

हिंगोली(जिमाका), दि. 05 : स्टोन क्रशर खदानीमधून अवैध गौणखनिज उत्खनन व वाहतूक प्रकरणात जप्त करण्यात आलेल्या जंगम मालमत्तेचा (वाहने व क्रशर मशीन) जाहीर द्वितीय फेरीचा लिलाव आयोजित करण्यात येत असल्याची माहिती तहसीलदार श्रीकांत भुजबळ यांनी दिली आहे.

अवैध गौणखनिज उत्खनन व वाहतूक प्रकरणात जप्त करण्यात आलेली वाहने व इतर जंगम मालमत्ता सोडविण्यासाठी संबंधित कसूरदारांना वारंवार सूचना देऊनही दंडात्मक रक्कम शासनाकडे जमा करण्यात आलेली नाही. तसेच जप्त जंगम मालमत्ता सोडविण्यासाठी मालक/कसूरदार न्यायालयासमोर हजर झालेले नाहीत. त्यामुळे एकूण सहा खदानधारकांकडील जप्त वाहने व क्रशर मशीनचा लिलाव करण्यात येणार आहे.

सदर जंगम मालमत्तेचे लघुत्तम मूल्य उपप्रादेशिक परिवहन अधिकारी, हिंगोली यांच्याकडील दि. 19 डिसेंबर 2025 च्या पत्रानुसार निश्चित करण्यात आले असून, त्या अनुषंगाने अटी व शर्तींच्या अधीन राहून जाहीर लिलावाची नोटीस प्रसिद्ध करण्यात आली आहे.

जप्त जंगम मालमत्तेचा जाहीर लिलाव मंगळवार, दि. 10 फेब्रुवारी 2026 रोजी सकाळी 11 ते दुपारी 2 वाजेपर्यंत महसूल मंडळ बासंबा, भांडेगाव, डिग्रस कऱ्हाळे अंतर्गत असलेल्या स्टोन क्रशर खदानच्या ठिकाणी बोली पद्धतीने घेण्यात येणार आहे.

लिलावामध्ये सहभागी होण्यासाठी इच्छुकांनी दि. 09 फेब्रुवारी 2026 रोजी सायंकाळी 5 वाजेपर्यंत तहसील कार्यालयातील गौणखनिज विभागात अर्ज सादर करणे आवश्यक आहे. अर्जासोबत प्रती वाहन 10 हजार रुपये अनामत रक्कमेचा धनादेश, पॅनकार्ड, आधारकार्ड व बँक पासबुक/स्टेटमेंटची छायाप्रत सादर करणे बंधनकारक आहे. पात्र अर्जदारांना लिलावासाठी टोकन देण्यात येईल.

लिलावाबाबत सर्व अधिकार उपविभागीय अधिकारी, हिंगोली व तहसीलदार, हिंगोली यांनी राखून ठेवले असून, लिलावातील अटी व शर्तींनुसारच प्रक्रिया राबविण्यात येणार आहे.

वरील अटी व शर्ती मान्य असलेल्या इच्छुक नागरिकांनी लिलावामध्ये सहभाग नोंदवावा, असे आवाहन तहसीलदार श्रीकांत भुजबळ यांनी केले आहे.

 

*******