विविध कर्ज योजनांची प्रकरणे बँकानी तात्काळ पूर्ण करावेत- जिल्हाधिकारी राहुल गुप्ता

• हिंगोली जिल्ह्याच्या पोटेन्शियल लिंक्ड प्लॅनचे जिल्हाधिकारी राहुल गुप्ता यांच्या हस्ते प्रकाशन

हिंगोली (जिमाका), दि. 26 : जिल्ह्यातील सर्व बँकांच्या विविध शासकीय कर्ज योजनांअंतर्गत कामगिरीचा सविस्तर आढावा जिल्हाधिकारी राहुल गुप्ता यांनी घेतला. यावेळी मुख्यमंत्री रोजगार निर्मिती कार्यक्रम, प्रधानमंत्री सूक्ष्म अन्न प्रक्रिया उद्योग उन्नती योजना तसेच दुग्ध व्यवसाय कर्ज योजनेअंतर्गत प्रकरणांची स्थिती, मंजुरी व वितरित कर्ज यांचा आढावा घेऊन विविध कर्ज योजनांची प्रकरणे तात्काळ निकाली काढून उद्दिष्टे लवकर पूर्ण करावेत, अशा सूचना जिल्हाधिकारी राहुल गुप्ता यांनी आढावा बैठकीत दिले. 

हिंगोली जिल्ह्याची बँकर्स जिल्हास्तरीय सल्लागार समिती व जिल्हास्तरीय पुनरावलोकन समितीची बैठक नुकतीच जिल्हाधिकारी राहुल गुप्ता यांच्या अध्यक्षतेखाली संपन्न झाली. या बैठकीस अग्रणी जिल्हा व्यवस्थापक सुजित झोडगे, जिल्हा विकास व्यवस्थापक अविनाश लहाने, जिल्हा उद्योग केंद्राचे महाव्यवस्थापक अनिल कदम, आरसेटी संचालक हेनराज बन्सोड, एमएसआरएलएमचे प्रतिनिधी, मत्स्यव्यवसाय व पशुसंवर्धन विभागाचे अधिकारी तसेच विविध बँकांचे वरिष्ठ अधिकारी उपस्थित होते.

या बैठकीमध्ये योजनांच्या अंमलबजावणीत गती आणण्याबाबत तसेच प्रलंबित प्रकरणे तात्काळ निकाली काढण्याच्या सूचना जिल्हाधिकारी श्री. गुप्ता यांनी संबंधित बँकांना दिल्या. तसेच ठरविण्यात आलेली उद्दिष्टे लवकरात लवकर पूर्ण करण्यासाठी सर्व यंत्रणांनी समन्वयाने कार्य करावे, असेही त्यांनी यावेळी निर्देशित केले.

या बैठकीदरम्यान हिंगोली जिल्ह्याचा पोटेन्शियल लिंक्ड प्लॅन (PLP) 2026-27 अधिकृतरित्या जिल्हाधिकारी राहुल गुप्ता यांच्या हस्ते प्रकाशित करण्यात आला. जिल्ह्याच्या आर्थिक विकासासाठी दिशादर्शक ठरणाऱ्या या दस्तावेजाचे महत्त्व यावेळी अधोरेखित करण्यात आले.

प्रकाशित करण्यात आलेला पोटेन्शियल लिंक्ड प्लॅन 2026-27 हा जिल्ह्यातील विविध क्षेत्रांतील पतक्षमतेचा सखोल आढावा घेणारा असून, जिल्ह्याच्या सर्वांगीण व शाश्वत विकासासाठी बँकांना मार्गदर्शन करणारा महत्त्वपूर्ण दस्तावेज असल्याचे यावेळी सांगण्यात आले.

******