महिला व बालविकास विभागाच्या योजनांची प्रभावी अंमलबजावणी करा : जिल्हाधिकारी राहुल गुप्ता

 

·         सनियंत्रण समिती व जिल्हास्तरीय ‘बेटी बचाव, बेटी पढाव’ टास्कफोर्स बैठकीत विविध योजनांचा आढावा

 

हिंगोली (जिमाका), दि. 24 : महिला व बालविकास विभागामार्फत राबविण्यात येणाऱ्या केंद्र पुरस्कृत योजनांची प्रभावी अंमलबजावणी करून त्यांची व्यापक प्रचार-प्रसिद्धी करावी. तसेच महिला व बालकांना आवश्यक सेवा अधिक सक्षमपणे उपलब्ध करून देण्यासाठी सर्व संबंधित यंत्रणांनी समन्वयाने कार्य करावे, असे निर्देश जिल्हाधिकारी राहुल गुप्ता यांनी दिले.

महिला व बालविकास विभागाच्या सनियंत्रण समितीची तसेच जिल्हास्तरीय ‘बेटी बचाव, बेटी पढाव’ योजनेंतर्गत टास्कफोर्सची बैठक आज जिल्हाधिकारी राहुल गुप्ता यांच्या अध्यक्षतेखाली जिल्हाधिकारी कार्यालयात पार पडली.

यावेळी जिल्हा महिला व बालविकास अधिकारी संतोष दरपलवार, जिल्हा कार्यक्रम अधिकारी, विधी सल्लागार, सहाय्यक पोलिस निरीक्षक, केंद्र प्रशासक, समुपदेशक तसेच संबंधित विभागांचे अधिकारी व कर्मचारी उपस्थित होते.

या बैठकीमध्ये ‘बेटी बचाव, बेटी पढाव’ योजना, वन स्टॉप सेंटर तसेच महिला समुपदेशन केंद्राच्या कामकाजाचा सविस्तर आढावा घेण्यात आला. केंद्र पुरस्कृत विविध योजनांची जनजागृती व प्रचार-प्रसिद्धी अधिक प्रभावीपणे करण्याच्या सूचना देण्यात आल्या. तसेच हिंगोली येथे वन स्टॉप सेंटरच्या स्वतंत्र इमारतीच्या बांधकामासाठी जिल्हा नियोजन समितीकडे प्रस्ताव सादर करण्याबाबत संबंधित अधिकाऱ्यांना निर्देश देण्यात आले.

******