• विशेष लोकअदालतीत १ कोटी ३ लाख ६६ हजार ६११ रुपयांची वसुली
हिंगोली, दि. १८ (जिमाका): जिल्हा विधी सेवा प्राधिकरण, परभणी यांच्या वतीने १८ जुलै २०२६ रोजी परभणी व हिंगोली जिल्ह्यात १३८ व्या राष्ट्रीय लोकअदालतीअंतर्गत विशेष लोकअदालतीचे आयोजन करण्यात आले. या विशेष लोकअदालतीत दाखल झालेल्या प्रकरणांपैकी ७० प्रकरणांचा यशस्वी निपटारा करण्यात आला असून एकूण १ कोटी ३ लाख ६६ हजार ६११ रुपयांची वसुली करण्यात आली.
विशेष लोकअदालतीत स्पेशल ड्राइव्ह (१३८ एन.आय. ॲक्ट) अंतर्गत प्रकरणे सुनावणीस घेण्यात आली. पक्षकारांमध्ये सामंजस्य निर्माण करून प्रकरणे जलदगतीने निकाली काढण्यात आल्याने न्यायप्रक्रियेला गती मिळाली तसेच संबंधित पक्षकारांचा वेळ आणि खर्चाचीही बचत झाली.
ही विशेष लोकअदालत यशस्वी करण्यासाठी प्रमुख जिल्हा व सत्र न्यायाधीश तथा जिल्हा विधी सेवा प्राधिकरणाचे अध्यक्ष आर. एम. सातवाणी यांच्या मार्गदर्शनाखाली सचिव बी. एम. काळे, परभणी व हिंगोली जिल्ह्यातील सर्व न्यायाधीश, जिल्हा वकील संघाचे पदाधिकारी, तसेच सर्व अधिवक्त्यांनी सक्रिय सहभाग नोंदविला.
जिल्हा विधी सेवा प्राधिकरणाने अधिकाधिक नागरिकांनी लोकअदालतीचा लाभ घेऊन आपली प्रकरणे सामंजस्याने निकाली काढावीत, असे आवाहन केले आहे.
*****
No comments:
Post a Comment