कळमनुरी येथे ग्राम बाल संरक्षण समितीचे प्रशिक्षण संपन्न

हिंगोली (जिमाका), दि. ०३: जिल्हा महिला व बाल विकास अधिकारी कार्यालय हिंगोली अंतर्गत कार्यरत जिल्हा बाल संरक्षण कक्षाच्यावतीने ‘मिशन वात्सल्य’ योजनेअंतर्गत कळमनुरी पंचायत समिती सभागृहामध्ये नुकतेच ग्राम बाल संरक्षण समित्यांचे प्रशिक्षण आयोजित करण्यात आले होते. या प्रशिक्षणात एकात्मिक बाल विकास प्रकल्प अधिकारी राजकुमार धापसे, सहायक पोलीस निरीक्षक ज्ञानेश्वर बसवंते, पोलीस उपनिरीक्षक संतोष इंगळे हे प्रमुख पाहुणे उपस्थित होते. ग्राम बाल संरक्षण समिती ही काळजी व संरक्षणाची गरज असणाऱ्या बालकांच्या गरजा व समस्या ओळखून बालकांना तात्काळ मदत करणारी एक प्रभावी अशी यंत्रणा आहे आणि त्यासाठी आजच्या प्रशिक्षणात ज्या महत्वपूर्ण कायद्यांवर मार्गदर्शन मिळणार आहे, ते काळजीपूर्वक समजून घेऊन आपल्या कार्यक्षेत्रात त्याची अंमलबजावणी करावी, असे आवाहन एकात्मिक बाल विकास प्रकल्प अधिकारी श्री. धापसे यांनी केले. बालविवाह ही समाजाला लागलेली कीड आहे. ही प्रथा मुळासकट नष्ट करणे गरजेचे आहे आणि यासाठी सर्व यंत्रणांनी मिळून पाऊल उचलणे गरजेचे असल्याचे सहायक पोलीस निरीक्षक ज्ञानेश्वर बसवंते यांनी सांगितले. बालक हे देशाची संपत्ती आहे, त्यांचे योग्य संगोपन होणे अत्यंत गरजेचे आहे. ग्राम बाल संरक्षण समितीच्या माध्यमातून हे कार्य अत्यंत चांगल्या प्रकारे होऊ शकते, असे पोलीस उपनिरीक्षक संतोष इंगळे यांनी भाष्य केले. या कार्यक्रमाचे प्रास्ताविक जिल्हा बाल संरक्षण अधिकारी सरस्वती कोरडे यांनी तर सूत्रसंचालन कायदा तथा परीविक्षा अधिकारी अँड. अनुराधा पंडित यांनी केले. या प्रशिक्षणात विविध विषयांवर संबंधित तज्ज्ञांनी पीपीटीच्या माध्यमातून मार्गदर्शन केले. जिल्हा बाल संरक्षण अधिकारी सरस्वती कोरडे आणि सामाजिक कार्यकर्त्या रेश्मा पठाण यांनी ग्राम बाल संरक्षण समितीची भूमिका, जबाबदाऱ्या व बाल संरक्षण यंत्रणेचे कार्य स्पष्ट केले तसेच ग्राम बाल संरक्षण समितीचे गठन या बाबत महत्त्व स्पष्ट केले. कायदा तथा परीविक्षा अधिकारी अँड. अनुराधा पंडित यांनी बालविवाह प्रतिबंधक कायदा 2006 अंतर्गत कायदेशीर बाबी आणि प्रतिबंधात्मक उपाय याबाबत माहिती दिली. बाल संरक्षण अधिकारी (संस्थाबाह्य) जरीब खान पठाण यांनी दत्तक विधान कायदेशीर प्रक्रिया याविषयी माहिती दिली. सामाजिक कार्यकर्ता रामप्रसाद मुडे यांनी महिला व बाल विकास विभागाच्या विविध योजना बाबत माहिती दिली. यामध्ये ‘क्रांतिज्योती सावित्रीबाई फुले बालसंगोपन योजना’, ‘प्रतिपालकत्व योजना’, ‘अनाथ प्रमाणपत्र’, ‘बालगृह’, ‘निरीक्षणगृह’ याविषयी माहिती दिली. तालुका संरक्षण अधिकारी गजानन घुगे यांनी कौटुंबिक हिंसाचारापासून महिलांचे संरक्षण कायदा २००५ याविषयी मार्गदर्शन केले. चाईल्ड हेल्पलाइन 1098 चे सुपरवायझर विकास लोणकर यांनी चाईल्ड हेल्पलाइन 1098 नंबर बाबत तात्काळ सेवा व फोन रिस्पॉन्स सिस्टीमची माहिती दिली. सखी वन स्टॉप सेंटरच्या केंद्र समन्वयक शीला रणवीर यांनी सखी सेंटरची कार्यपद्धती स्पष्ट केली. आभार प्रदर्शन (चाईल्ड हेल्पलाइन 1098) चे सुपरवायझर सूरज इंगळे यांनी केले. या दोनसत्रीय प्रशिक्षणासाठी जिल्हा बाल संरक्षण कक्षातील बाल संरक्षण अधिकारी (संस्थात्मक) गणेश मोरे, समुपदेशक सचिन पठाडे, क्षेत्रबाह्य कार्यकर्ता अनिरुद्ध घनसावंत, चाईल्ड हेल्पलाइन 1098 चे प्रकल्प समन्वयक संदीप कोल्हे, सुपरवायझर धम्मप्रिया पखाले, श्रीकांत वाघमारे, केस वर्कर तथागत इंगळे, राजरत्न पाईकराव, समुपदेशक अंकुर पाटोडे, सखी वन स्टॉप सेंटरचे जहीर खान गफूर शाह यांनी सहकार्य केले. *****