शासकीय कर्मचाऱ्यांचा सर्वकष माहितीकोष तयार करण्यासाठी माहिती अद्ययावत करा

हिंगोली(जिमाका), दि. 06 : शासकीय कर्मचाऱ्यांचा सर्वकष माहितीकोष 2025 तयार करण्याचे काम जिल्हा सांख्यिकी कार्यालयामार्फत सुरु आहे. जिल्ह्यातील सर्व राज्य शासकीय कार्यालयातील आहरण व संवितरण अधिका-यांनी त्यांच्या कार्यालयाची व त्यांच्या आस्थापनेवरील नियमित, नियमितेत्तर, रोजंदारीवरील, अंशकालीन, मानसेवी व तदर्थ तत्त्वावर असलेल्या सर्व कर्मचाऱ्यांची दि. 01 जुलै 2025 या संदर्भ दिनांकास अनुसरुन माहिती ऑनलाईन आज्ञावलीमध्ये नोंदविणे बंधनकारक आहे. सर्व आहरण व संवितरण अधिकारी यांनी अर्थ व सांख्यिकी संचालनालयाच्या https://mahades.maharashtra.gov.in/CGE या संकेतस्थळावर जाऊन त्यांच्या कार्यालयाची माहिती अद्ययावत करावयाची आहे. ही माहिती ऑनलाईन आज्ञावलीत नोंदणी करून जिल्हा सांख्यिकी कार्यालय, हिंगोली यांचे प्रमाणपत्र-2 जोडल्याशिवाय माहे नोव्हेंबर 2025 (नोव्हेंबर पेड इन डिसेंबर 2025) चे वेतन देयक तसेच ऑनलाईन आज्ञावलीत भरलेल्या माहितीतील त्रुटी आज्ञावलीत दुरुस्त करून प्रमाणपत्र-2 जोडल्याशिवाय माहे फेब्रुवारी 2026 (फेब्रुवारी पेड इन मार्च 2026) चे वेतन देयक कोषागार कार्यालयामार्फत स्वीकारण्यात येणार नाहीत याची सर्व आहरण व संवितरण अधिकारी यांनी नोंद घ्यावी, असे आवाहन जिल्हा सांख्यिकी कार्यालयाच्या उपसंचालकांनी केले आहे. *****