राष्ट्रीय खाद्यतेल अभियान- तेलबिया काढणी पश्चात प्रक्रिया घटकाच्या अनुदानासाठी 31 जुलै पूर्वी अर्ज सादर करा

हिंगोली (जिमाका), दि. 19 : केंद्र व राज्य पुरस्कृत राष्ट्रीय खाद्यतेल अभियान तेलबिया अंतर्गत सन 2025-26 या वर्षासाठी तेलबिया उत्पादनातील कार्यक्षमता वाढवण्यासाठी काढणी पश्चात पायाभूत सुविधा या घटकांतर्गत शासकीय खाजगी उद्योग, शेतकरी उत्पादक संस्था, कंपनी (एफपीओएस) आणि सहकारी संस्था यांना अनुदान दिले जाणार आहे. तेलबिया संकलन, तेल काढणे आणि तेल उत्पादन कार्यक्षमता वाढवणे तसेच सध्या कार्यरत पायाभूत सुविधांची क्षमता किंवा कार्यक्षमता सुधारण्यासह कापनीनंतरच्या पायाभूत सुविधांच्या उभारणीसाठी व कापूस बियाणे, नारळ, तांदुळ कोंडा खाद्य दुय्यम स्त्रोताव्दारे तेल उत्पादनास प्रोत्साहन देणे हा उद्देश आहे. काढणीनंतरच्या मूल्य साखळीसाठी मदतीचे प्रमाण हे तेल काढणी युनिट (10 टन क्षमता) आणि तेलबियांवर प्रक्रिया करण्यासाठी यंत्रसामग्री आणि उपकरणे, तेलबिया प्रक्रिया यूनिट या प्रकल्प खर्चाच्या 33 टक्के कमाल 9 लाख 90 हजार रुपये यापैकी जे कमी असेल त्याप्रमाणे अनुदान अनुज्ञेय राहील. केंद्र शासनाच्या सूचनेनुसार मुल्य साखळी भागीदार (व्हॅल्यू चैन पार्टनर) यांना विपणन व्यवस्था व प्रक्रिया उद्योगाशी जोडण्यासाठी या घटकांतर्गत मदतीसाठी मूल्य साखळी भागीदाराला प्राधान्य देण्यात येईल. या घटकांतर्गत जमीन आणि इमारतीसाठी सहाय्य दिले जाणार नाही किंवा प्रकल्प खर्चाची गणना करताना सदर खर्चाचा विचार केला जाणार नाही. ही बाब बँक कर्जाशी निगडीत आहे. हिंगोली जिल्ह्यातील शासकीय खाजगी उद्योग, मूल्य साखळी भागीदार (व्हॅल्यू चैन पार्टनर), शेतकरी उत्पादक संस्था, कंपनी आणि सहकारी संस्थांनी फार्मर आयडी, आधारकार्ड व बँक खात्यांचा तपशील इत्यादी कागदपत्रे संबंधित तालुका कृषि अधिकारी कार्यालयाकडे दि. 31 जुलै, 2025 पूर्वी अर्ज सादर करावेत. पूर्वसंमती देण्यात आलेल्या लाभार्थी संस्थांनी प्रकल्प पूर्ण केल्यानंतर त्यांना अनुज्ञेय असलेले अनुदान त्यांच्या बँक खात्यावर थेट लाभ हस्तांतर पध्दतीने वर्ग करण्यात येईल. या योजनेचा लाभ जिल्ह्यातील योग्य शासकीय खाजगी उद्योग शेतकरी उत्पादक संस्था, कंपनी आणि सहकारी संस्था यांची निवड होण्यासाठी जास्तीत जास्त संस्थांनी सहभाग घ्यावा. अधिक माहितीसाठी कृषि विभागाच्या कार्यालयास संपर्क साधावा, असे आवाहन राजेंद्र कदम, जिल्हा अधीक्षक कृषि अधिकारी, हिंगोली यांनी केले आहे *****