जिल्हाधिकारी राहुल गुप्ता यांच्या हस्ते जिल्ह्यात नवीन तुती लागवडीचा शुभारंभ

हिंगोली (जिमाका), दि. 16 : जिल्हाधिकारी राहुल गुप्ता यांच्या हस्ते व राज्याचे रेशीम उपसंचालक डॉ. महेंद्र ढवळे यांच्या उपस्थितीत दि.15 जुलै, 2025 रोजी हिंगोली तालुक्यातील डिग्रस कऱ्हाळे येथील शेतकरी संतोष अप्पाराव कऱ्हाळे यांच्या शेतात नवीन तुती लागवडीचा शुभारंभ करण्यात आला. यावेळी जिल्हाधिकारी श्री. गुप्ता यांनी सर्व शेतकऱ्यांना शेतीतील उत्पन्न दुप्पट करण्यासाठी पीक पध्दतीत बदल करुन पारंपरिक पिकांऐवजी रेशीम शेती करावी असे आवाहन करुन इतर पिकांपेक्षा रेशीम शेती अधिक फायदेशीर असल्याचे सांगितले. राज्याचे रेशीम उपसंचालक डॉ.महेंद्र ढवळे यांनी रेशीम शेतकऱ्यांना तांत्रिक मार्गदर्शन करुन महात्मा गांधी राष्ट्रीय रोजगार हमी योजनेतून तीन वर्षामध्ये 4 लाख 32 हजार 240 रुपयाचे अनुदान असून या योजनेचा लाभ घेण्याचे आवाहन केले. तसेच डिग्रस कऱ्हाळे येथील उपस्थित सर्व शेतकऱ्यांना रेशीम शेती ही इतर पिकांपेक्षा चांगली आणि जास्त उत्पन्न देणारी आहे, असे सांगितले. नवीन तुती लागवड पध्दतीचे प्रात्यक्षिक दाखवून तुती लागवडीचा शुभारंभ करण्यात आला. यावेळी उपस्थित हिंगोलीचे तहसीलदार श्रीकांत भुजबळ, जिल्हा रेशीम विकास अधिकारी ए.एस.वडवळे, राधा पाटील, राजू रणवीर, नितीन लोलगे, रजनीश कुटे, कुलदीप हरसुले, केतन प्रधान, रमेश भवर, तान्हाजी परघणे, प्रगतशील शेतकरी सुदाम खिल्लारे, श्री.शेख आंधरवाडीकर, श्रीधर शृंगारे आदी शेतकरी उपस्थित होते. ******