राष्ट्रीय खाद्यतेल अभियान-तेलबिया अंतर्गत गोदाम बांधकामास अनुदानासाठी 24 सप्टेंबर पूर्वी अर्ज करा

हिंगोली (जिमाका), दि.18 : राष्ट्रीय खाद्यतेल तेल अभियान-तेलबिया अंतर्गत सन 2025-26 या योजनेअंतर्गत 250 मेट्रिक टन क्षमतेचे गोदाम बांधकाम या बाबीसाठी प्रत्यक्ष खर्चाच्या 50 टक्के किंवा 12 लक्ष 50 हजार रुपये यापैकी जे कमी असेल ते अनुदान अनुज्ञेय आहे. ही बाब बँक कर्जाशी निगडीत असून इच्छूक शेतकरी उत्पादक संघ, कंपनी यांनी 24 सप्टेंबर, 2025 पूर्वी अर्ज सादर करावा, असे आवाहन जिल्हा अधीक्षक कृषी अधिकारी राजेंद्र कदम यांनी केले आहे. यासाठी वखार महामंडळाच्या तांत्रिक निकषानुसार डिझाईन, स्पेसिफिकेशन, खर्चाचे अंदाजपत्रकाप्रमाणे बांधकाम या आर्थिक वर्षात पूर्ण करणे बंधनकारक आहे. गोदामाचा वापर शेतकऱ्यांनी उत्पादित केलेला कृषीमाल साठवणुकीसाठी शेतकऱ्यांना योग्य व माफक दर आकारुन करावा. याबाबत 100 रुपयाच्या स्टँम्प पेपरवर नोटराईज्ड हमीपत्र आवश्यक आहे. हिंगोली जिल्ह्यातील शेतकरी उत्पादक कंपनी, संघ यांनी फार्मर आयडी, सातबारा, आधारकार्ड व बँक खात्यांचा तपशील आदी कागदपत्रे संबंधित तालुका कृषी अधिकारी किंवा मंडळ कृषी अधिकारी कार्यालयाकडे दि.24 सप्टेंबर 2025 पूर्वी सादर करावेत. पूर्वसंमती देण्यात आलेल्या कंपन्यांनी बांधकाम पूर्ण केल्यानंतर त्यांना अनुज्ञेय असलेले अनुदान शेतकरी उत्पादक कंपनी किंवा संघ यांच्या खात्यावर थेट हस्तांतर पध्दतीने वर्ग करण्यात येईल. या योजनेचा लाभ घेण्यासाठी जिल्ह्यातील जास्तीत जास्त शेतकरी उत्पादक संघ किंवा कंपनी यांनी संबंधित तालुका कृषी अधिकारी यांच्याकडे अर्ज करावेत. अधिक माहितीसाठी तालुका कृषी अधिकारी कार्यालयास संपर्क साधावा, असे आवाहन जिल्हा अधीक्षक कृषी अधिकारी राजेंद्र कदम यांनी केले आहे. ******