पुरवठासाखळी निर्मिती उद्योग उभारण्यासाठी नव उद्योजकांनी पुढे यावे -- जिल्हाधिकारी राहुल गुप्ता

हिंगोली (जिमाका), दि. 12 : जिल्ह्यामध्ये मोठ्या प्रमाणात उद्योगवाढीसाठी निर्मिती उद्योगामध्ये विद्यमान उद्योजकांना सलग्न असा पुरवठासाखळी निर्मिती उद्योग उभारण्यासाठी नव उद्योजकांनी पुढे यावे, असे आवाहन जिल्हाधिकारी राहुल गुप्ता यांनी आढावा बैठकीत केले. जिल्हाधिकारी राहुल गुप्ता यांच्या अध्यक्षतेखाली त्यांच्या कक्षात आज उद्योग विभागाच्या अडी-अडचणी एकाच क्षेत्राखाली सोडविण्यासाठी आढावा बैठक घेण्यात आली. या बैठकीत जिल्हाधिकारी श्री. गुप्ता यांनी उद्योजक, व्यापारी संघटना यांच्या अडचणी जाणून घेऊन त्या तात्काळ निकाली काढण्याच्या सूचना संबंधित विभागाला दिल्या. एमआयडीसीतील अतिक्रमित जागेची मोजणी करुन अतिक्रमण हटवावे. तसेच उद्योगाविषयी उद्योजकांच्या तक्रारी एक खिडकीद्वारे सोडविण्यासाठी जिल्हा उद्योग केंद्राचे महाव्यवस्थापक तथा नोडल अधिकारी यांच्याकडे आपले निवेदन सादर करावे, अशा सूचनाही दिल्या. या बैठकीस जिल्हा उद्योग केंद्राचे महाव्यवस्थापक अनिल कदम, उद्योग निरीक्षक सुदेशना सवराते, एमआयडीसीचे अधिकारी, नंदकिशोर तोष्णीवाल, रमेश पंडित, गजानन मगर यांच्यासह जिल्ह्यातील उद्योजक, विविध उद्योग संघटनेचे पदाधिकारी, व्यापारी संघटनांचे पदाधिकारी उपस्थित होते. *****