थेट कर्ज योजनेसाठी 25 सप्टेंबरपर्यंत अर्ज सादर करा

हिंगोली (जिमाका), दि.18 : साहित्यरत्न लोकशाहीर अण्णाभाऊ साठे विकास महामंडळ (मर्या.) हिंगोली जिल्हा कार्यालयास सन 2025-26 या आर्थिक वर्षाकरिता थेट कर्ज योजना राबविली जाणार आहे. यासाठी 50 लाभार्थ्याचे भौतिक उद्दिष्ट प्राप्त झाले आहे. थेट कर्ज योजनेचे कर्ज प्रस्ताव हिंगोली जिल्ह्यातील मांग, मातंग समाज व तत्सम 12 पोट जातीतील तसेच मातंग समाजातील राज्य स्तरावरील क्रीडा पुरस्कारप्राप्त (महिला व पुरुष) व्यक्तींना व सैन्य दलातील वीरगती प्राप्त वारसाच्या एका सदस्यास प्राधान्याने लाभ देण्यासाठी इच्छूक अर्जदारांकडून अर्ज मागविण्यात येत आहेत. यासाठी साहित्यरत्न लोकशाहीर अण्णाभाऊ साठे विकास महामंडळ (मर्या.), डॉ.बाबासाहेब आंबेडकर सामाजिक न्याय भवन रिसाला बाजार, सरकारी दवाखान्यासमोर, जिल्हा कार्यालय हिंगोली येथे दि. 25 सप्टेंबर 2025 पर्यंत कार्यालयीन वेळेत सुट्टीचे दिवस वगळून सकाळी 10 ते सायंकाळी 5 या वेळेत अर्ज सादर करावेत. या तारखेनंतर येणारे अर्ज स्वीकारण्यात येणार नाहीत, असे आवाहन साहित्यरत्न अण्णाभाऊ साठे महामंडळाच्या जिल्हा व्यवस्थापकांनी केले आहे. जिल्ह्यातील मांग, मातंग समाज व तत्सम 12 पोट जातीतील इच्छुक अर्जदाराचे वय 18 वर्ष पूर्ण असावे व 50 वर्षापेक्षा जास्त नसावे. शहरी व ग्रामीण अर्जदाराच्या कुटुंबाचे वार्षिक उत्पन्न 3 लाखापेक्षा जास्त नसावे. तसेच अर्जदाराने यापूर्वी महामंडळाच्या कुठल्याही योजनेचा लाभ घेतलेला नसावा. नियमाप्रमाणे आवश्यक त्या कागदपत्राची पूर्तता करुन या योजनेत साधारणपणे समाविष्ट लघु व्यवसाय उदाहरणार्थ मोबाईल सर्व्हिसिंग रिपेअरिंग, फूड प्रॉडक्ट प्रोसेसिंग, किराणा दुकान, जनरल स्टोर, मेडिकल स्टोर, फॅब्रिकेशन, वेल्डिंग व सेनेटरी शॉप, प्रिंटिंग, शिवणकला, झेरॉक्स, लॅमीनेशन, हॉटेल, कॅटरिंग, सर्व्हिसेस, मंडप डेकोरेशन क्रीडा साहित्य, स्पोर्ट शॉप, ज्यूस सेंटर, क्लॉथ, रेडिमेड गारमेंट शॉप, मोटार मेकॅनिक रिपेअर, शेतीशी निगडीत पुरक जोडव्यवसाय इत्यादी व्यवसायासाठी (कर्ज प्रस्ताव तीन प्रतीत स्वत: अर्जदाराने मुळ कागदपत्रासह उपस्थित राहून दाखल करावे.) त्रयस्थ, मध्यस्थामार्फत कर्ज प्रकरणे स्वीकारण्यात येणार नाहीत. कर्ज प्रकरणे दाखल करताना जातीचा दाखला, उत्पन्नाचा दाखला, रेशनकार्डची झेरॉक्स प्रत, आधारकार्ड, पॅनकार्डची झेरॉक्स प्रत, तीन पासपोर्ट फोटो, व्यवसायाचे परपत्रक (कोटेशन), व्यवसाय ज्या ठिकाणी करावयाचा आहे त्या ठिकाणचे भाडे पावती, करार पत्रक किंवा मालकी हक्काचा पुरावा (नमुना नं.8, लाईट बील व टॅक्स पावती), ग्रामपंचायत, नगरपालिका, महानगरपालिका यांचे प्रमाणपत्र किंवा शॉप ॲक्ट परवाना, व्यवसाय संबंधी तांत्रिक प्रमाणपत्र तसेच अनुभव प्रमाणपत्र, शैक्षणिक दाखला, अनुदान किंवा कर्जाचा लाभ न घेतलेले प्रमाणपत्र, अर्जदाराचे सीबील क्रेडिट स्कोर 500 असावा, अर्जदाराने आधारकार्ड जोडलेल्या बँक खात्याचा तपशील, प्रकल्प अहवाल, प्रकरणासोबतची सर्व कागदपत्रे स्वत:च्या स्वाक्षरीने साक्षांकित केलेली कागदपत्रे सादर करावीत. यासाठी एका कुटुंबातील एकाच व्यक्तीस या योजनेचा लाभ घेता येईल, अशी माहिती साहित्यरत्न अण्णाभाऊ साठे महामंडळाच्या जिल्हा व्यवस्थापकांनी दिली आहे. *******